入戲院睇戲，不外乎買飛劃位入場坐低對住大銀幕，全世界都冇乜唔同，不過原來數數下，入英國戲院睇戲同喺香港都係有少少分別。
（上圖為英國影后Olivia Colman以Empire戲院為背景的新片《Empire of Light》劇照）
買月票任睇
來英國之後入戲院睇戲次數大增，因為Odeon myLIMITLESS月費£14.99任睇實在太吸引，除了個別特別場次如3D、Imax、豪華影院等要加錢，全線普通戲院適用，基本上每個月入場兩次已經抵返。另一間連鎖戲院Cineworld月票更加平，£10.99平過Netflix，不過限制多少少。以上兩間戲院提供大路戲，中意獨立文藝電影可以入會Curzon，年中慳唔少錢。想睇倫敦電影節，可以做英國電影協會BFI會員方便搶飛，BFI戲院平時都會重映經典電影，例如最近正上映大師黑澤明的作品。仲有，一直唔明點解香港上網買戲飛要畀手續費，明明幫戲院慳咗人力物力，英國上網買戲飛冇手續費之餘仲時不時有特別優惠。
睇唔完嘅廣告
大概係呢個原因，先至可以收你咁平月費。在英國睇戲每次播正片前都有一大輪廣告+預告片，最離譜嗰陣播足半粒鐘有多，每次預遲15分鐘入場就差唔多。
日韓電影少，港產片反而唔少
講緊大路戲院，唔計專門播亞洲片的小眾戲院，相比香港，日本韓國電影的上映數目當然冇得比。這邊上映的日本片多數是動畫電影，韓國電影更加少，我去年只入戲院睇過《分手的決心》，亞洲電影來講唯獨印度戲有大量。幸好多得香港有心人搞手，港產片反而有唔少，從Mirror擔正的《阿媽有咗第二個》、口碑載道的《正義迴廊》、《飯氣攻心》到小品《緣路山旯旮》都有得上大銀幕，當然仲有香港都冇得睇的《時代革命》、《憂鬱之島》。講到其他上映電影，荷里活大片都大同小異，歐洲片比想像中少，比較特別係英國有多好多Theatre現場。
第一行都坐得過
都係土地問題，無論大細戲院，英國戲院冇香港戲院賺到咁盡，就算坐第一行都唔使昂高頭頸都痠。唔知係咪我去開地區戲院的關係，場場都坐唔滿，永遠唔會買唔到飛，久而久之已經習慣左右冇人咁安安靜靜睇戲，相對地氣氛係會差少少。
唔使偷運零食
英國各大戲院如Odeon、Empire、Cineworld等都容許客人帶食品入場，只要唔係熱食、氣味太強烈嘅食品或酒精類飲品就可以。