入伙大半個月，雖然新居仍需小修小補、添購傢俬日用品進行中（暫時忘掉於碼頭等過關的一大堆家當），但總算有心情寫寫租樓記。前陣子個幾星期內瘋狂睇咗廿個單位，由頭兩日揀唔落手一度心灰意冷打算另覓倫敦邊皮山卡啦地區，到漸入佳境最後竟然有幾間入到排行榜的幸福煩惱，最大感歎是倫敦樓真的很上鏡
── 縱然明白網絡世界和現實有差距，但當你看見要拉繩開燈的慘綠浴室、閃靈feel走廊都難免嚇一嚇。希望有人睇完本文可以預先避開伏位，慳返啲時間，或者，至少，有定心理準備都好吖。
戴定頭盔先，本人初到貴境兼無地產相關專業知識，搵租盤上最大路的Rightmove/Zoopla（最穩陣應該係Rightmove，因為唔可以免費刊登租盤，曾經有人喺Zoopla中伏，新聞都有報。當然平到出奇的租盤，都係小心為上。），然後儘量找地產經紀幫忙（前前後後見過十幾個不同style的經紀，試過有間係Openrent業主盤但約唔到睇屋），以下純屬個人經驗分享。
地點
住邊區真係畀唔到意見，人人需求唔同，睇餸食飯，自己Street check有晒詳細資料， 我的目標是倫敦南面（普遍認為交通較北面差）Zone 3左右月租大概1200鎊的一房單位，如果你budget高一點又是另一回事。可以留意（上google已經睇到），這邊很多鐵路沿線單位無遮無擋，天天每隔十分鐘就有近到觸手可及的車廂略過，長遠影響身心健康。
Furnished VS Unfurnished
強烈建議剔選埋unfurnished。相信好多人會與我最初想法一樣，一切未有定案，短住睇下點先，有齊傢俬他日搬屋免卻麻煩。但很多furnished單位的傢俬，真係肉酸到想像唔到邊度搵返來，如果你睇相見到啲傢私好靚……睇真啲，多數係unfurnished。所以如果你一開始篩選走unfurnished，選擇真係少好多。其實計返條數，搵啱心水盤後，平平地宜家搞掂（起碼正常樣）都會舒服好多。
光線
Apartment或terraced house（排屋），我無乜所謂，兩種都有睇。但好多時排屋個設計係客廳偏暗，尤其有頂層斜屋頂那種，影出來光猛的多數視覺效果。
周邊環境、怪異鄰居、甩皮甩骨……
以上真係睇相睇唔到，親身去到先知，有次喺分層排屋的大堂見到貼住張紙好聲好氣勸鄰居深夜靜少少，但張紙又被狠狠地破壞，都咪話唔擔心。有啲屋閒閒地幾十年歷史，殘舊在所難免，不過太過分的業主通常肯執，時間嘛……英國節奏囉……
不過說到底，倫敦樓之所以上鏡，因為其絕大部分都是四四正正，間隔實用，廳房廚廁比例正常，沒有香港奇則與騎呢裝修，才會間間都中上樣。隨住禁逐租客令取消，估計租盤多咗，租金應該會下調少少，祝各位搵屋順利，早日安居！
